Messa í Borgarvirki

Á mánudagskvöldið var var messa í Borgarvirki. Kórinn frá Hvammstanga söng og séra Sigurður predikaði. Ég skellti mér ásamt krökkunum mínum og tengdamömmu. Fórum með teppi og brunuðum tímalega af stað. Fengum frábært veður og sæmilegt bílastæði. Já bílastæðið skiptir nefnilega máli þarna hjá Borgarvirki því ef maður kemur seint verður að leggja bara einhvers staðar og jafnvel laanngtt í burtu. Þetta er í fyrsta skipti sem ég skelli mér í messu þarna. Einhvern veginn þarf alltaf eitthvað að vera að gera eða einhver að koma í heimsókn. Jæja hvað um það. Sungnir voru sálmar sem tilkynnt var að allir kynnu. Hmmm ég hef nú stundum oltið inn í kirkju svona við og við en aldrei heyrt þessa sálma sem sungnir voru þarna. Svo var fólk hvatt til að syngja hátt með. Ég gerði mitt besta og raulaði lágt þó bara rétt til að sýnast. En þetta var ánægjuleg stund á mögnuðum stað. Svolítið magnað og um leið skrítið að fara í messu á heiðnum stað en svona er Ísland í dag.

      

Athugasemdir

[Guðrún Jóhannesdóttir, 28.6.2008 kl. 17:02]

það hefur verið frábært að vera þarna. Heiðinn staður? jú kannski, en er heiðni ekki líka trú, og krafturinn bara einn, hvort sem hann er nefndur þór eða Guð eða eitthvað annað.

Þú verður bara að stunda messurnar af meira kappi til að kunna sálmana sem "allir" kunna

knús í sveitina